Mjegulla e dendur u ka mundësuar trupave ruse të shtyhen më tej në qytetin kyç strategjik të Pokrovskut në Ukrainën lindore. Ushtria ukrainase thotë se kushtet e motit, veçanërisht mjegulla e dendur, e kanë shtyrë Moskën të intensifikojë përpjekjet e saj për të futur një numër gjithnjë e më të madh ushtarësh në qytetin e rrënuar dhe për të rrethuar forcat ukrainase. Forcat ruse kanë kaluar më shumë se një vit duke u përpjekur të pushtojnë qytetin. Ushtria e Ukrainës thotë se tani mund të ketë 300-500 rusë atje dhe Presidenti Voloydymyr Zelensky thekson se situata mbetet e vështirë. Ndërkohë, shefi i ushtrisë Oleksandr Syrskyi thotë se situata në vijën e frontit në rajonin juglindor të Zaporizhias është "përkeqësuar ndjeshëm", me humbjen e tre vendbanimeve. Syrskyi tha megjithatë se Rusia ishte më aktive rreth Pokrovskut. Një video është bërë virale në mediat sociale që tregon ushtarë rusë duke ecur nëpër një rrugë të mjegullt me makina dhe motoçikleta. Për disa ditë me radhë mjegulla ka penguar shikueshmërinë për zbulime ajrore, thotë një pilot droni nga njësia "Shershni Dovbusha" e brigadës së 68-të me emrin e luftës "Goose". Kjo është arsyeja pse rusët madje kanë "guxuar" të nisin sulme duke përdorur një kolonë automjetesh, të cilat normalisht do të ishin zhdukur menjëherë nga dronët ukrainas. Piloti thotë se njësia e tij kishte zbuluar dhe eliminuar rregullisht grupe të vogla ruse që përpiqeshin të përparonin në këmbë dhe me motoçikleta por ai shtoi se ata ishin gjithashtu të përfshirë në sprapsjen e sulmit të paraqitur në videon virale, që thuhet se është filmuar të dielën. Autokolona u shkatërrua pjesërisht, pretendon "Goose", megjithatë kushtet e motit nënkuptonin se nuk kishte monitorim video të momentit kur ata sprapsën sulmin, kështu që ai nuk ishte i sigurt nëse i gjithë grupi u godit.