Rusia lëshoi 108 dronë në të gjithë Ukrainën gjatë natës duke goditur një tren mallrash, makinisti i të cilit u plagos, thanë autoritetet ukrainase, pasi udhëheqësit evropianë iu bashkuan Presidentit Volodymyr Zelenski në kërkimin e një armëpushimi 30-ditor që niste nga kjo e hënë. Mbrojtja ajrore ukrainase shkatërroi 55 nga dronët që Rusia lëshoi nga ora 23:00 e së dielës, tha forca ajrore e Ukrainës në aplikacionin e mesazheve Telegram. Sulmi përfshinte gjithashtu 30 dronë simulues që humbën gjatë rrugës pa goditur asnjë shënjestër. Dronët u rrëzuan në pjesët lindore, veriore, jugore dhe qendrore të Ukrainës, tha forca ajrore. Drejtuesi i një treni mallrash u plagos në një sulm me dron në infrastrukturën hekurudhore në rajonin lindor të Donetskut, tha Hekurudha Ukrainase. "Propozimet për armëpushim po injorohen, sulmet armiqësore ndaj infrastrukturës hekurudhore vazhdojnë," tha Hekurudha Ukrainase në një postim në aplikacionin e mesazheve Telegram. Presidenti i Rusisë, Vladimir Putin, i quajti kërkesat për armëpushim "ultimatume" dhe nga ana tjetër, propozoi bisedime të drejtpërdrejta me Ukrainën që synojnë t'i japin fund luftës, një iniciativë e përqafuar kjo edhe nga Presidenti amerikan, Donald Trump.