Shqipëria dhe rruga e saj drejt Bashkimit Europian ishin ndër çështjet për të cilat u pyet kryeministri grek, Kyriakos Mitsotakis, gjatë konferencës tradicionale për shtyp në kuadër të Panairit të 90-të Ndërkombëtar të Selanikut. I pyetur për marrëdhëniet me Tiranën, veçanërisht për çështjet e pronave dhe të drejtat e minoritetit grek në Shqipëri, Mitsotakis tha se Greqia mbështet perspektivën europiane të Ballkanit Perëndimor, por theksoi se çdo vend do të vlerësohet veçmas në bazë të progresit të tij. “Progresi që është bërë në regjistrimin e pronave dhe në mbrojtjen e të gjitha të drejtave nuk është i mjaftueshëm. Të jeni të sigurt se, në momentin e duhur, do të ushtrojmë të drejtat tona për t’u siguruar që të drejtat e minoritetit mbrohen plotësisht”, deklaroi kryeministri grek. Mitsotakis theksoi se çështja nuk është vetëm dypalëshe mes Athinës dhe Tiranës, por lidhet edhe me respektimin e së drejtës europiane. Sipas tij, hapja dhe mbyllja e kapitujve të negociatave kërkon edhe miratimin e vendeve anëtare të Bashkimit Europian.