Shkëmbimi i zjarrit në fshatin Rranxë të Bashkisë së Vaut të Dejës mbrëmjen e së premtes alarmoi policinë e Shkodrës. Por, më shumë se ngjarja, grupi hetimor që shkoi në vendngjarje u alarmua nga provat e gjetura në të. Mbi 30 gëzhoja armësh të ndryshme të përdorura në konflikt dhe një automjet tip Audi i blinduar. Veprimet e para të kryera nga grupi hetimor ishte identifikimi i personave të përfshirë në këtë ngjarje. Nga kamerat e sigurisë u verifikua se makina na e cila është hapur zjarr fillimisht ishte tip BMW që është larguar me shpejtësi. Në kërkim u shpallën tre persona, dy prej të cilëve vëllezër. Burime të Top Neës pohojnë se automjeti tip BMW është në pronësi të tyre, ndërsa nga verifikimet paraprake, Audi i blinduar është përdorur më parë edhe nga Eljo Hato, personazh i njohur i botës së krimit, i shpallur në kërkim nga SPAK prej kohësh dhe konsideruar si krahu i djathtë i Ervis Martinajt. Hato u ka shpëtuar tre herë aksioneve të policisë dhe RENEA-s, ku herën e fundit forcat speciale i shkuan në shtëpi dhe i vranë dy qentë e banesës së tij. Tashmë kërkimet për Haton vijojnë ende por të gjitha aksionet nuk kanë sjellë ndonjë rezultat për lokalizmin e saktë dhe arrestimin e tij.