Një pjesë e kanalit të Madh në Venecia u bë e gjelbër fosforeshente të dielën, duke shtyrë policinë të nisë hetimin, në mesin e spekulimeve se kjo mund të ishte vepër e ambjentalistëve. Gondolierët mund të shiheshin teksa canin përmes ujërave fosforeshentë ndërsa turistët i bënin fotografi zonës së gjelbër nga ura Rialto dhe përgjatë kanalit. Ngjyra u dallua fillimisht nga banorët lokalë, tha presidenti i rajonit të Venetos Luka Zaia. “Prefekti ka kërkuar një takim urgjent me policinë për të zbuluar shkaqet e kësaj ngjarjeje”, tha ai. Skuadrat e zjarrfikësve në Itali thanë se po ndihmonin agjencinë për mbrojtjen e ambjentit për të marrë kampionë nga uji të cilët më pas do të testohen. Kjo nuk është sidoqoftë hera e parë që Kanali i madh bëhet i gjelbër. Në 1968, artisti argjentinas, Nikolas Garcia Uriburu i bëri ujërat e kanalit të madh të gjelbra me bojë fosforeshente gjatë bienales së 34 të venecias, në një përpjekje për të promovuar ndërgjegjësimin ekologjik. Policia tani po heton nëse ngjarja e të dielës mund të jetë apo jo një protestë e aktivistëve të klimës.