Ekuipazhi i Polaris Daën, i SpaceX, është rikthyer në Tokë pas pesë ditësh në orbitë, pas një misioni historik që shënoi edhe shëtitjen e parë komerciale në hapësirë. Kapsula Dragon ra në brigjet e Floridës pak pas orës 03:37 minuta, sipas orës lokale, ndërsa gjithcka transmetohej live nga Space X. "Ulja e Dragon u konfirmua! Mirë se vini përsëri në Tokë," tha SpaceX në platformën e medias sociale X. Agjencia amerikane e hapësirës NASA tha se misioni përfaqësonte "një hap gjigant përpara" për industrinë komerciale të hapësirës. Ekuipazhi kaloi pesë ditë në hapësirë dhe mori pjesë në shëtitjen e parë komerciale atje. Ekipi civil prej katër anëtarësh, i financuar dhe i udhëhequr nga miliarderi Jared Isaacman, udhëtoi në hapësirë më larg se çdo njeri në më shumë se pesëdhjetë vjet. Scott Poteet, një pilot në pension i Forcave Ajrore të SHBA dhe punonjësit e SpaceX Sarah Gillis dhe Anna Menon ishin gjithashtu në bord. Isaacman dhe Gillis janë ekuipazhi i parë joprofesionist që kryen një ecje në hapësirë, një manovër e rrezikshme që përfshin uljen e presionit në kabinën e ekuipazhit dhe daljen nga anija kozmike. Vetëm astronautët nga agjencitë hapësinore të financuara nga qeveria e kishin tentuar këtë, përpara këtij fluturimi.