India ka fikur pajisjen e saj në Hënë - të parën që ka arritur ndonjëherë në polin jugor hënor - pasi ka përfunduar misionin e saj dyjavore duke kryer eksperimente, tha Agjencia Hapësinore e Indisë. Pajisja Pragyan, e nisur me anijen kozmike Chandrayaan-3, është vënë në "gjumë”, mirëpo bateritë vazhdojnë t’i karikohen, tha agjencia përmes një postimi në X. “Shpresojmë për një zgjim të suksesshëm për kryerjen e detyrave në të ardhmen. Përndryshe, do të duhet të qëndrojë përgjithmonë atje si ambasador i Indisë në Hënë”, tha agjencia indiane e hapësirës. Duke zbarkuar në Hënë, India u është bashkuar Shteteve të Bashkuara dhe ish-Bashkimit Sovjetik, si vendet e vetme që kanë arritur atje. Por, ditët e fundit, India ka shkuar edhe më tej, duke zbarkuar në polin jugor, disa ditë pasi Rusia ka dështuar në një përpjekje të ngjashme. Agjencia indiane e hapësirës tha se roveri indian Pragyan ka udhëtuar mbi 100 metra, duke konfirmuar prezencën e sulfurit, hekurit, oksigjenit dhe elementeve tjera në Hënë. Tani India është duke shpresuar edhe për një tjetër mision të suksesshëm, pasi të shtunën nisi një tjetër pajisje drejt Diellit. “Sateliti është i shëndetshëm” dhe është në orbitë të Tokës, tha agjencia të dielën, ndërsa pajisja përgatitet për një udhëtim prej 1.5 milion kilometrash.