Ish-kryeministri Sali Berisha mblodhi më 11 dhjetor 2021, Kuvendin e jashtëzakonshëm Kombëtar, me firmën e më shumë se ¼-ës së delegatëve, duke ndërmarrë një sërë vendimesh të rëndësishme, ku më kryesori ishte ai i shkarkimit të kryetarit Lulzim Basha. Në Kuvendin e thirrur nga Berisha, morën pjesë 4934 delegatë, numri i të cilëve shfaqej automatikisht në ekranet e vendosur në ambientet e stadiumit. Me votë unanime u vendos shkarkimi i Lulzim Bashës, vendim i cili më pas do të ratifikohej në 18 dhjetor me referendumin brenda partisë, në të njëjtën ditë që do të mbahej Kuvendi Kombëtar i thirrur nga Lulzim Basha. Ky Kuvend do të vendoste përjashtimin e Berishës nga partia, me ndryshimin statutor për pastrimin e partisë nga personat ‘non grata’. Pavarësisht dy Kuvendeve, asnjë prej liderëve nuk do njohtë vendimet e dala prej tyre, por më 25 mars, 4 ditë pas dorëheqjes publike të Lulzim Bashës, Gjykata e Tiranës do të regjistronte Statutin e dalë nga Kuvendi i 11 dhjetorit, duke njohur zyrtarisht Berishën dhe grupin e Rithemelimit. Por ky vendim do të rrëzohej rreth 1 vit më vonë nga Gjykata e Apelit, përkatësisht më 3 mars 2022, duke e kthyer çështjen për rigjykim në Shkallën e parë, vendim i cili nuk do të pranohej nga Berisha, i cili bëri rekurs në Gjykatën e Lartë, ku çështja vijon të jetë ende e pashqyrtuar.