Presidenti francez, Emmanuel Macron po angazhohet për një armëpushim në luftën e Gazës. Të hënën ai u takua me presidentin egjiptian Abdel Fattah al-Sisi dhe mbretin jordanez Abdullah II. Presidenti francez mbërriti të dielën në mbrëmje për një vizitë në Kajro ndërsa të martën Macron da të udhëtojë pranë Rripit të Gazës. Sipas Pallatit të Elysée-ut, ai planifikon një takim me punonjësit humanitarë në qytetin Al-Arish për të nënvizuar mbështetjen e tij për një armëpushim mes Izraelit dhe Hamasit. Arish ndodhet rreth 50 kilometra nga Rripi i Gazës dhe është një pikë e rëndësishme kalimi për dërgimin e ndihmave në territorin palestinez. Ky është takimi i dymbëdhjetë mes Macron dhe al-Sisit, që kur presidenti francez mori detyrën në vitin 2017. Por ky udhëtim konsiderohet veçanërisht i rëndësishëm. "Do të flitet për krizat në rajon, në Siri dhe vendet fqinje të Libisë, Sudanit dhe Izraelit," tha Pallati i Elysée-ut. Ka shpresë po ashtu për një përparim në konfliktin në Lindjen e Mesme, duke pasur parasysh rolin e Francës si një urë lidhëse me botën arabe. Zyrtarisht u tha se tema qendrore është bashkëpunimi ekonomik. Por fokusi i vërtetë është tek lufta në Gaza. Izraeli së fundi e theu armëpushimin e arritur në janar me Hamasin dhe nisi një ofensivë të re në Rripin e Gazës.