Gjatë mbylljes së vizitës në Kanada, kryetari i Bashkisë së Tiranës, Erion Veliaj, është pritur në një takim edhe nga kryetarja e Bashkisë së Mississaugas, Chris Fonseca. Veliaj shprehu mirënjohjen e tij për mikpritjen që iu është bërë qytetarëve shqiptarë në këtë qytet, ku vlen të thuhet se janë me mijëra. “Është një kënaqësi e veçantë për delegacionin tonë që e mbyllim vizitën në qytetin e Mississaugas. Dua të falenderoj kryetaren, është vërtet një mikpritje e jashtëzakonshme! Nëse mikpritja jonë është vetëm disa minuta, mikpritja që Mississauga i ka ofruar komunitetit shqiptar është 30-vjeçare. Ndaj, jam posaçërisht mirënjohës që i keni hapur dyert, qytetin dhe institucionet e Bashkisë, të Qeverisë, të arsimit, komunitetit shqiptar, që siç e dëgjuam dhe nga kolegët tanë shqiptarë këtu, është vërtet duke lulëzuar. Kur një vend ngre flamurin e një kombi tjetër, kur përqafon gjuhën e një kombi tjetër, kur lejon shkollat e një vendi tjetër, tregon se është në fakt një vend i emancipuar”.