Socialistët siguruan 84 votat e nevojshme për miratimin e amnistisë penale. Pas shtyrjes së votimit disa herë gjatë paradites së të enjtes, pasdite mazhoranca u mblodh pa praninë e deputetëve të Partisë Demokratike dhe kaloi projektligjin e propozuar nga Ministria e Drejtësisë. Kryeministri Rama u kthye nga Roma për të qenë i pranishëm në seancë, ndërkohë që mungonte Belinda Balluku si dhe deputetja e larguar tashmë nga PS-ja, Marjana Koçeku. Në ndihmë socialistëve këtë herë i erdhën edhe tre deputetët e Partisë Socialdemokrate. Dy deputetët e partisë Mundësia, Agron Shehaj dhe Erald Kapri, megjithëse të pranishëm në seancë nuk morën pjesë në votim, teksa socialistët rrëzuan të gjitha amendimet e propozuara nga opozita për amnistinë.