Ministrja suedeze e Klimës tërhoqi vëmendjen në takimin e ministrave të BE-së në Luksemburg, duke marrë me vete djalin e saj vetëm 3-muajsh, Adamin. Sipas një zyrtari të Këshillit të BE-së, është hera e parë që një foshnjë merr pjesë në një mbledhje të tillë ministrore. Zyrtarja suedeze tha se synimi i saj ishte të tregonte se gratë nuk duhet të detyrohen të zgjedhin mes karrierës dhe familjes, falë politikave mbështetëse të lejes prindërore. Ajo sapo është kthyer në punë pas lejes së lindjes, ndërsa bashkëshorti i saj po shfrytëzon lejen prindërore për t’u kujdesur për foshnjën. Suedia konsiderohet një nga vendet me sistemin më bujar të lejes prindërore në botë. Prindërit përfitojnë rreth 16 muaj leje të paguar. Ministrja theksoi se politika të tilla ndihmojnë familjet të balancojnë më mirë jetën profesionale dhe atë private, ndërsa u bëri thirrje qeverive të investojnë edhe në kujdes më të përballueshëm për fëmijët dhe rregulla më fleksibile për ndarjen e lejes prindërore. “Nuk është pengesë, është thjesht pjesë e jetës”, komentoi zëvendësministri polak i Klimës, duke mbështetur praninë e foshnjës në takimin e nivelit të lartë.