Ka dështuar të mbahet seanca e shqyrtimit fillestar në rastin për rezervat shtetërore në Gjykatën Themelore të Prishtinës, për shkak të mos paraqitjes së ministres në detyrë të Industrisë, Ndërmarrësisë dhe Tregtisë, Rozeta Hajdari dhe avokatit të saj. Përmes një postimi në FaceBook, ministrja në detyrë, Rozeta Hajdari, ka theksuar se nuk I është dërguar asnjë thirrje zyrtare nga Gjykata për këtë seancë. Pas reagimit të ministres në detyrë, Gjykata e Prishtinës ka reaguar për mediat në Kosovë, duke thënë se ftesa ministres i është dërguar që më 19 nëntor përmes postës. Prokuroria Speciale kishte ngritur aktakuzë më 11 nëntor ndaj Ministres Rozeta Hajdari, ish-zëvendëssekretarit Irfan Lipovicës, drejtorit të Departamentit të Rezervave Shtetërore në këtë Ministri Hafiz Garës dhe afaristit Ridvan Muharremit, lidhur me skandalin e rezervës shtetërore, ku dëmi i shkaktuar është afër 3 milionë euro.