Greqia po shton përpjekjet për të rifilluar negociatat me Shqipërinë për përcaktimin e zonave detare mes dy vendeve, në një proces që prej vitesh ka mbetur i bllokuar. Ministri grek i Mbrojtjes, Nikos Dendias, do të vizitojë Tiranën të hënën për takime të nivelit të lartë. Sipas burimeve diplomatike, ai do të zhvillojë fillimisht një takim me homologun shqiptar, Ermal Nufi, në Ministrinë e Mbrojtjes. Më pas, Dendias do të pritet nga kryeministri Edi Rama, ndërsa në vijim është parashikuar edhe një drekë pune në rezidencën kryeministrore. Në agjendën e ministrit grek është edhe një takim me Kryepeshkopin e Tiranës, Durrësit dhe gjithë Shqipërisë, Joanin. Mediat greke raportojnë se Athina dhe Tirana synojnë të shfrytëzojnë klimën pozitive në marrëdhëniet mes dy vendeve për të çuar përpara dialogun mbi çështjen detare.