Presidenti amerikan, Donald Trump, një ish sipërmarrës i pronave të paluajtshme, me rikthimin në Shtëpinë e Bardhë, ka marrë laps dhe letër në dorë dhe po bën llogari e po mbyll kontrata. Ndërsa ka folur për marrjen nën kontroll amerikan të territoreve apo edhe shteteve, ka nisur dëbimin masiv të emigrantëve dhe ka vendosur taksa për importet që hyjnë në SHBA, ai po përpiqet të plotësojë një premtim të fushatës, për ti dhënë fund luftës në Ukrainë...Dhe në natyrën e tij si biznesmen, nuk mundet të mos shohë edhe në këtë përpjekje, anën financiare. Ai ka folur së fundmi për mineralet e rralla, si pjesë të një marrëveshjeje për luftën, madje ka thënë se sekretari amerikan i thesarit do të udhëtojë në ukrainë për të diskutuar për to. Sidoqoftë, ideja duket se është hedhur dhe mbështetet edhe nga ukraina. Por, cfarë janë mineralet e rralla. Ato nevojiten për telefonat celularë, makinat elektrike ose dronët: 17 elementë janë grupuar nën termin e zakonshëm metale të rralla. Vetitë e tyre ndryshojnë por ato grupohen nën një term të përbashkët sepse shpesh gjenden së bashku në natyrë. Këto minerale janë bërë shumë të rëndësishme për ekonominë. Ato përdoren për prodhimin e përçuesve, telefonave celularë dhe makinave elektrike. Në epokën e digjitalizimit, ato janë një aset i rëndësishëm strategjik. Secili prej metaleve ka veti që e bëjnë atë të vlefshëm për industrinë, disa madje janë të domosdoshëm. Metalet e rralla gjejnë aplikim edhe në prodhimin e dronëve, disqeve, lenteve teleskopike, raketave dhe avionëve luftarakë. Shumica e metaleve të rralla të tokës janë relativisht të zakonshme në koren e Tokës. Në një vlerësim të vitit 2024, Shërbimi Gjeologjik i Shteteve të Bashkuara vlerëson rezerva globale prej të paktën 110 milionë tonësh, 44 milionë prej të cilave ndodhen në Kinë, deri tani prodhuesi më i madh në botë. 22 milionë tonë të tjerë janë në Brazil, 21 milionë në Vietnam, dhjetë milionë në Rusi dhe shtatë milionë tonë në Indi. Në sfondin e konfliktit tregtar me Kinën, i rindezur tani nga Presidenti Trump, rëndësia e metaleve të rralla ka vazhduar të rritet. Metalet e rralla janë një pikë e dhimbshme për industrinë amerikane. SHBA ka dominuar tregun botëror për vite me radhë, por tani janë shumë të varura nga importet. E nga kjo po përpiqet të përfitojë edhe presidenti ukrainas Volodimir Zelenski.