Një brez i ri nacionalistësh etnikë serbë po përgatiten për një luftë në Bosnjë, zbulon The Telegraph. Qindra militantë kanë udhëtuar për në Ukrainë për të luftuar përkrah trupave ruse me besimin se "Nëna Rusi" do t'i shpërblejë duke i ndihmuar të rimarrin territoret e humbura serbe si Kosova. Nacionalistët, përfshirë veteranët nga Lufta e Bosnjës, po përdorin mediat sociale për të inkurajuar të rinjtë serbë që t'u bashkohen atyre në Rusi. Disa madje ofrojnë 25,000 euro që ata të regjistrohen dhe të luftojnë në Ukrainë. Ekziston frika se sapo të kthehen në shtëpi në Bosnjë, ata do të nxisin një konflikt paramilitar, 30 vjet pas përfundimit të Luftës së Bosnjës. Dario Ristic është një prej këtyre militantëve. Nacionalisti serb, duke ecur me ngadalë me një këmbë protezë dhe duke mbajtur në dorë provën e shtetësisë së tij të sapo fituar, u kthye në Bosnjë. Ai ishte plagosur ndërsa luftonte në Ukrainë me një njësi ruse të njohur si Arinjtë nga Permi. Ndërsa ndodhej në Ukrainë, Ristic njihej me nofkën e luftës "i shpejti" dhe për kryerjen e sulmeve me snajper dhe dronë në qytete si Avdiivka. Ai i përsosi aftësitë e tij në mediat sociale në faqe si TikTok dhe rrjeti rus Vkontakte, duke siguruar mbështetje nga të rinjtë serbë të pakënaqur politikisht në vendlindje duke reklamuar luftimet në vijën e frontit dhe duke përhapur mesazhe nacionaliste. Njësia e tij ruse madje i dërgoi një kartolinë ditëlindjeje Ratko Mlladiçit, kriminelit të luftës i cili mbahet në Hagë ku u dënua me burg të përjetshëm për mizori të kryera kundër myslimanëve boshnjakë. Në një video të postuar në Telegram, Ristic pozon pranë një bashkëkombësi serb i cili informo njerëzit në vendlindje: "Sapo të mbarojmë me këta fashistët e NATO-s këtu, do të kthehemi për të rifituar vendet tona të shenjta dhe atë që është e jona. Lavdi Zotit, lavdi Nënës Rusi - fitore!"