Në Partinë Socialdemokrate në Gjermani, ka ende anëtarë që i janë mirënjohës Gerhard Schröderit. Për shembull kundërshtimi i tij për luftën në Irak pati shumë përkrahës. Por pas këmbënguljes së Schröderit për mosdorëzimin e mandateve që ka në kompanitë ruse, edhe socialdemokratëve i humbi durimi. Partnerët e koalicionit, SPD, Të Gjelbrit dhe liberalët duan tani ti heqin privilegjet ish-kancelarit. Në këtë kërkesë thuhet, se zyra që ka në dispozicion ish-kancelari në Bundestag do të mbyllet. Po ashtu i kërkohet qeverisë që të verifikojë që privilegjet e tjera të rrjedhin nga detyrimet që vazhdojnë pas postit, dhe jo të jenë të lidhura me statusin. Me këtë vendosen kritere që vlejnë edhe për ish-kancelarët e tjerë dhe ata të ardhshëm. Kontratat e vendeve të punës që janë rezervuar për ish-kancelarin në Bundestag do të vazhdohen deri më 19 maj 2022. Personeli i mbetur do të merret me përmbylljen e detyrave të zyrës dhe më pas do të kalojë në poste të tjera.