Në gjithë Ukrainën u lëshuan sirena për të paralajmëruar sulme të mundshme ruse mëngjesin e së mërkurës, ndërsa autoritetet ukrainase u kërkuan qytetarëve të strehohen në bunkerë. “Rrezik për sulme raketore nëpër territorin e Ukrainës! Avionët rusë MiG-31Ks po ngrihen nga pista ajrore Savasleika, në rajonin rus Nizhny Novgorod”, paralajmëruan Forcat Ajrore të Ukrainës në rrjetin social Telegram. Ato u bënë thirrje ukrainasve të mos i shpërfillin paralajmërimet për sulme të mundshme ajrore. Prej fillimit të këtij viti, Rusia ka kryer sulme të mëdha dhe vazhdueshme ajrore nëpër rajonet e Ukrainës. Vetëm më 8 janar, ajo sulmoi rajonet e Ukrainës me një breshëri raketash nga ajri, duke vrarë të paktën katër persona, duke plagosur mbi 40 të tjerë, si dhe duke shkaktuar dëme në infrastrukturën civile dhe objektet e biznesit. Një ditë më parë, Zyra e OKB-së për Koordinim të Çështjeve Humanitare tha se më shumë se 14.6 milionë ukrainas brenda vendit, apo rreth 40 për qind e popullsisë së përgjithshme, do të kenë nevojë për ndihmë humanitare gjatë këtij viti, sepse lufta e Rusisë po vazhdon të shkaktojë vdekje dhe shkatërrim. Gjendja e tanishme humanitare ka shumë mundësi të përkeqësohet më shumë këtë vit, nëse luftimet vazhdojnë dhe nëse shtohen sulmet ndaj energjisë dhe infrastrukturës tjetër të rëndësishme.