Dy meteorë të mëdhenj kanë shpërthyer në qiellin e Zelandës së Re ditët e fundit, duke mahnitur të apasionuarit pas eventeve të tilla qiellore dhe duke tërbuar kafshët. Një lëmsh zjarri u pa mbi pjesë të Ishullit të Veriut mbrëmjen e të martës, pasi një tjetër meteor ishte shfaqur të dielën në mbrëmje në qiellin e Ishullit të Jugut. Pamjet e kapura nga kamerat e makinave, kamerat e sigurisë dhe kamerat speciale të meteorëve treguan qiellin e Ishullit të Veriut që ndriçohej nga një lëmsh i madh drite, ndërsa dhjetëra njerëz në mediat sociale treguan se kishin dëgjuar një bum të madh. “Ishte e pabesueshme. Mendova se ishte një aeroplan në flakë”, shkruante një komentues. “Ishte gjigant, lëmshi ishte portokalli me një bisht vjollcë”, shkruante një tjetër. Ndërsa të tjerë përdorues të mediave sociale flisnin për një gjëmim që trembi zogjtë në zonë dhe një dëshmitar tha se lopët e tij ishin çmendur. Pas rënies së topave të zjarrit banorët kanë nisur të kërkojnë edhe mbetjet e meteorëve. Vetëm 10 meteorë të konfirmuar janë gjetur në Zelandën e Re në 150 vitet e fundit, por me shumë gjasa, shumë të tjerë kanë rënë dhe nuk janë gjetur kurrë. Gjetja e një meteori në fakt mund të jetë e vështirë pasi Zelanda e Re ka një popullsi të vogël që nuk ka gjasa të dallojë shumicën e meteorëve që hyjnë në atmosferë, ka terren të thyer dhe të dendur që mund të pengojë kërkimin e mbetjeve, dhe ka mungesë infrastrukture për të ndihmuar në lokalizimin e vendit të rënies.