Presidenti Ilir Meta e ka konsideruar alarmante situatën e koronavirusit në të cilën ndodhet aktualisht Shqipëria. Ai i ka dërguar një letër me propozime ministres së Shëndetësisë, Ogerta Manastirliu për përballimin e situatës së krijuar në javët e fundit me pandeminë në vendin tonë. Por, letra me 11 propozime i është drejtuar edhe kryeministrit Rama dhe kryeparlamentarit Gramoz Ruçi, propozime, që sipas kreut të shtetit vijnë pas takimit që kreu i shtetit zhvilloi me një grup ekspertësh të shëndetit publik dhe mjekë, ku qeveria u përfaqësua nga zv.ministri Albert Nikolla. Mes propozimeve kryesore Ilir Meta kërkon nga Manastirliu futjen sa më shpejt në përdorim të testeve të shpejta, kthimin e disa spitaleve rajonale në spitale Covid dhe mbi të gjitha një çmim favorizues për testet Covid.