Presidenti i Republikës, Ilir Meta ka komentuar raportin e Kombeve të Bashkuara që e rendit Shqipërinë në një nga vendet që kryeson listën e vendeve me rritje të emigracionit. Në një postim në rrjetet sociale, Meta ka publikuar grafikun ku krahasohen largimet në vitin 2015 me vitin 2020 ku shihet një shifër e rritur. Presidenti ngre shqetesimin se shpopullimi është drama më e madhe që po i ndodh vendit. Sipas këtyre konkluzioneve, ka vijuar kreu i shtetit, mesatarja e të larguarve në vitin 2020 ishte mbi 550 qytetarë për 100 mijë banorë, një tendencë dukshëm në rritje në krahasim me vitin 2015, kur treguesi ishte rreth 350 emigrantë për 100 mijë banorë. Meta në postimin e tij ka kërkuar shumëfishimin e përpjekjeve të te gjithë aktorëve, jo vetëm për t’i thënë NDAL SHPOPULLIMIT, por për programe konkrete e realiste, sipas tij që u krijojnë mundësi më të mira qytetarëve e sidomos të rinjve. Të bëjmë gjithçka, që shqiponjat të qëndrojnë dhe të kthehen në folenë e tyre dhe Shqipëria të ngrihet lart, atje ku e meritojnë ëndrrat dhe sakrificat e shqiptarëve, ,mbyll postimin e tij Presidenti Meta.