Presidenti Ilir Meta i ka dhënë Kuvendit pëlqimin për hyrjen menjëherë në fuqi të ligjit për daljen e Shqipërisë në tregun e Eurobondit. Meta ka miratuar kërkesën e Kuvendit me disa rezerva për hyrjen në fuqi të projektligjit “Për Eurobondin, që do të emetohet nga Ministri i Financave dhe Ekonomisë, miratimin e përjashtimeve nga tatimet e taksat dhe të parashikimeve për heqjen dorë nga imuniteti, në marrëveshjet që do të lidhen nga Ministri i Financave dhe Ekonomisë”. Kjo dhënie pëlqimi bëhet e vlefshme vetëm pas miratimit të projektligjit nga Kuvendi. Kreu i Shtetit i bën thirrje deputetëve të shqyrtojnë me vëmendje këtë nismë para miratimit të saj, të konsiderojnë faktet, diskutojnë dhe vendosin me transparencë dhe përgjegjësi, pasi kemi të bëjmë me një instrument, që jo vetëm duhet trajtuar me kujdes, por duhet përdorur me efikasitet për ekonominë së vendit. Presidenti Meta i kërkon qeverisë, Ministrisë së Financave dhe Ekonomisë, si dhe Komisionit për Ekonominë dhe Financat, që të paraqesin një raport para deputetëve dhe seancës plenare, në mënyrë shteruese lidhur me arsyet përse vijohet të ndiqet praktika e administrimit të financave të vendit me vendimmarrje urgjente; sqarimet ndaj rritjes së huamarrjes që duhet të trajtohet me kujdes ndaj rrezikut të kursit të këmbimitl; analizë e plotë të kostos dhe përfitimit të marrjes hua në tregun e brendshëm apo në tregun e huaj, ose një kombinim i tyre; një listim të saktë të projekteve që synohet të mbulohen me këtë shumë për të cilën po tentohet të dilet në Eurobond, veçanërisht nëse huamarrja synohet të përdoret për të financuar deficitin dhe borxhin e marrë. Presidenti përsërit thirrjen ndaj Qeverisë dhe Kuvendit, që në nisma të tilla ligjvënëse, të veprojnë në kohën e duhur, në mënyrë që t`u lihet hapësira e nevojshme të gjitha strukturave apo institucioneve për shqyrtimin dhe vlerësimin e tyre. Shqipëria pritet të marrë një hua prej 500-700 milionë eurosh përmes eurobondit. Sipas ministres Delina Ibrahimaj, Shqipëria pritet të dalë në tregjet ndëkombëtare deri në fund të tetorit.