Duke e konsideruar një sjellje të papërgjegjshme dhe në shkelje të ligjit atë të bashkisë së Tiranës për të nxjerrë nga zyrat partinë Fryma e Re Demokratike, presidenti Ilir Meta në një konferencë për shtyp ka folur për momentet e përplasjes. Sipas tij dera e selisë të FRD ishte mbyllur dhe rrethuar me policë bashkiakë si të ishte skenë krimi. “Situata e paligjshme dhe e dhunshme që ndodhi në selinë e FRD dhe sulmi i dhunshëm ndaj kësaj force politike opozitare, vetëm pak ditë pas nënshkrimit të një marrëveshje me PD dhe aleatët, është një tjetër tregues i sjelljes së papërgjegjshme të mazhorancës për dëmtimin e aktivitetit të kësaj force politike. Ky sulm siç u ndoq nga të gjithë shqiptarët bie ndesh me të gjitha parimet demokratike të shtetit të së drejtës. Meta në fjalën e tij e ka cilësuar si një sulm të mazhorancës për të minuar pluralizmin në vend, teksa ka theksuar faktin se në letrën e lëshuar nga kryetari i Bashkisë, Erion Veliaj, nuk ka asnjë referencë ligjore për të nxjerrë partinë Fryma e Re Demokratike për të liruar zyrat. Le të kalojmë te faktet. Në ambientet e FRD ishte ngjitur diku në korridoret e saj një letër, pa origjinë, pa nënshkrim, pa emër titullari, pa vulë institucioni, pa numër protokolli, e datës 3 mars, me qëllim që ta bënin të dukej si një akt zyrtar për të justifikuar veprimet e dhunshme dhe arbitrare për terrorizimin e kësaj force politike. Përmes kësaj letre që nuk plotëson asnjë element minimal të një akti administrativ, i kërkohej FRD lirimi i ambienteve për nevoja të bashkisë së Tiranës. Kjo letër nuk citonte në përmbajtjen e saj asnjë bazë ligjore apo asnjë referencë ku mbështetej ky njoftim. Duke theksuar se ka një plan të qartë për mbrojtjen e zgjedhjeve të 25 prillit, presidenti I vendit, ka ashpërsuar tonet teksa ka paralajmëruar kryeministrin se përgjigja e tij në mbrojtje të Kushtetutës së vendit do të jetë së bashku me popullin, pa dallim ngjyrimi politik.