Ushtria e Tajvanit ka rifilluar mësimet "antikomuniste" për të diplomuarit pas një çerek shekulli, tha të dielën ministria e mbrojtjes, duke përmendur një kërcënim në rritje nga Kina, ndërsa një zyrtar i lartë raportoi sërish rritje të aktivitetit detar kinez. Gjatë Luftës së Ftohtë, fushatat në Tajvan që paralajmëronin kundër rreziqeve të "banditëve komunistë" në Kinë, qeveria e së cilës e sheh ishullin si territorin e vet, ishin të përhapura. Por "arsimi patriotik antikomunist" për të diplomuarit ushtarakë përfundoi në vitin 2002, duke u riemëruar thjeshtë "arsim patriotik". Ministria e mbrojtjes e Tajvanit tha në një deklaratë se mësimet për të diplomuarit e akademisë së saj ushtarake ishin rikthyer për shkak të rrezikut në rritje ushtarak dhe atij të infiltrimit nga Kina. "Është e nevojshme që ata të kuptojnë qartë kërcënimet e sigurisë kombëtare dhe të njohin misionin ushtarak, 'pse dhe për kë luftojmë'", tha deklarata. Kina nuk ka hequr dorë kurrë nga përdorimi i forcës për të vënë Tajvanin nën kontrollin e saj. Ushtria e Kinës ndërkohë vepron pothuajse çdo ditë rreth Tajvanit. Që nga e premtja, Tajvani ka gjurmuar një rekord prej më shumë se 110 anijesh ushtarake dhe të Rojës Bregdetare kineze përgjatë zinxhirit të parë të ishujve. Të shtunën, Roja Bregdetare e Kinës nisi një patrullë të re në brigjet lindore të Tajvanit, duke marrë një përgjigje të ashpër nga Taipei, që tha se Pekini nuk ka juridiksion në ato ujëra.