Më shumë se 50 persona dyshohet se janë mbytur pasi anija me të cilën po shkonin nga Libia drejt Evropës, u fundos në det. Sipas zëdhënësit të Ministrisë së Mbrojtjes së Tunizisë, 33 të mbijetuar nga fundosja e anijes, u gjetën teksa po mbaheshin në hekurat e një platforme për nxjerrjen e naftës, në jug të Tunizisë. Anija me mbi 90 pasagjerë u nis të dielën nga porti libian i Zuëara-s. Nuk janë ende të qarta shkaqet e mbytjes së anijes, por shpesh është gjendja e tyre e keqe, si dhe udhëtimi natën edhe në mot të keq, për të shmangur pikasjen nga rojet bregdetare. Nuk dihet ende kombësia e 50 të zhdukurve. Të hënën, marina tuniziane njoftoi se kishte shpëtuar mbi 100 emigrantë, kryesisht nga Bangladeshi dhe Sudani, anija e të cilëve ishte duke u fundosur. Gjithashtu, disa anije të tjera u bllokuan dhe u kthyen në breg gjatë së dielës. Sipas OKB, të paktën 1200 njerëz humben jetën në detin Mesdhe gjatë vitit të kaluar.