Marina Izraelite ka intensifikuar operacionet dhe mbikëqyrjen ndaj lëvizjeve të Marinës Turke, duke synuar të pengojë atë që zyrtarët izraelitë e konsiderojnë një zgjerim të ndikimit dhe ambicieve të Ankarasë në rajon. Sipas shkrimit të publikuar nga Jerusalem Post, mesazhi që Izraeli synon t’i përcjellë Turqisë është i qartë: Ankaraja nuk mund të lëvizë flotën e saj lirshëm në zonat me interes strategjik për Izraelin pa u përballur me reagimin e tij. Forcat e Armatosura Izraelite (IDF) thuhet se janë në gatishmëri për çdo lëvizje të mundshme turke, në det, tokë apo ajër. Mbikëqyrja shtrihet në zonat pranë Greqisë dhe Qipros, por edhe në Siri dhe Gaza. Sipas raportimit, Izraeli e konsideron Sirinë si pikën më të ndjeshme në raport me Turqinë. Izraeli ka kundërshtuar zgjerimin e pranisë ushtarake turke në territorin sirian, veçanërisht instalimin e radarëve dhe sistemeve të tjera që mund të kufizojnë lirinë e veprimit të forcave izraelite. Tel Avivi ka kundërshtuar gjithashtu përfshirjen e Turqisë në Forcën Ndërkombëtare të Stabilizimit për Gazën. Një tjetër skenar i përmendur nga Jerusalem Post është mundësia e bashkëpunimit mes Izraelit dhe Egjiptit për të frenuar ambiciet detare të Turqisë. Megjithatë, situata mbetet komplekse. Në muajt e fundit është vënë re një afrim mes Ankarasë dhe Kajros, i cili është shoqëruar edhe me rritjen e bashkëpunimit ushtarak. Analistët vlerësojnë se bashkëpunimi mes tyre mund të shkojë përtej diplomacisë tradicionale dhe të çojë në një koordinim më të thellë ushtarak. Pavarësisht afrimit mes Turqisë dhe Egjiptit, Kajroja vazhdon të ketë rezerva ndaj ambicieve të Ankarasë, veçanërisht për çështje që lidhen me Libinë dhe Mesdheun Lindor. Ndërkohë, bashkëpunimi ushtarak mes Greqisë dhe Izraelit vazhdon të forcohet.