Në mesazhin e parë publik, udhëheqësi suprem i Iranit, ajatollah Ali Khamenei, “shpalli” fitoren ndaj Izraelit. Ai e quajti një triumf luftën 12 ditore, ndërsa reagimi i tij erdhi dy ditë pas arritjes së armëpushimit. Khamenei qëndroi larg syrit të publikut gjatë 12 ditëve të luftës. Ai u shfaq vetëm dy herë përmes dy videomesazheve. I pari më datë 19. Në mesazhin e ri, Khamenei përgëzoi iranianët për atë që e quajti “fitore ndaj regjimit të rremë sionist”, duke thënë se Izraeli “është gjymtuar dhe shtypur nga goditjet e Republikës Islamike”. Duke iu referuar sulmeve ajrore amerikane ndaj ndërtesave bërthamore të Iranit, ai tha se “amerikanët nuk mundën të bënin asgjë të rëndësishme”, duke akuzuar SHBA-në se ka “ekzagjeruar” dëmin e shkaktuar “për të fshehur të vërtetën”. Disa analistë kanë thënë se mungesa e shfaqjes së Khameneit sinjalizoi një pasiguri të paprecedent për të ardhmen e udhëheqjes së Iranit, duke nxitur spekulime lidhur me stabilitetin e brendshëm të vendit dhe rrezikun për pasoja më të gjera në Lindjen e Mesme.