Kryeministri Edi Rama paralajmëroi qytetarët që të kenë kujdes nga një skemë mashtrimi, sipas tij, me mesazhe telefonike të rreme nga persona të panjohur që flasin në emër të personave publikë, përfshirë këtu politikanë. Një lojë mashtruese me kompjutera që imitojnë numrin e telefonit për të dërguar mesazhe të rreme, ka dëmtuar disa persona deri më sot, shkruan Rama. Policia e Shtetit, thotë Kryeministri, ka ndaluar dhe çuar para drejtësisë disa prej këtyre mashtruesve, të cilët kanë arritur të marrin para prej të dëmtuarve. Por ndërkohë që policia vazhdon punën e saj për identifikimin e të tjerëve, Rama u sugjeron të gjithë atyre që marrin mesazhe në emrin e personave publikë, të verifikojnë paraprakisht vërtetësinë e dërguesit, që të shmangin kurthin e kësaj loje kriminale. Pak javë më parë, Policia ndaloi një person nga Përrenjasi, që përmes mesazheve telefonike të dërguara ndaj një biznesmeni pretendonte se ishte Taulant Balla. Sipas dosjes në ngarkim të tij, përmes këtij mesazhi, personi në fjalë kishte arritur që t’i merrte 100 mijë euro biznesmenit.