Mbrëmjen e të shtunës një automjet është qëlluar me armë zjarri në fshatin Urakë të Njësisë Administrative Rukaj, në bashkinë Mat. Ngjarja është regjistruar rreth orës 23:10 minuta, kur persona ende të paidentifikuar kanë qëlluar me armë zjarri në drejtim të një automjeti tip ‘Audi’, në pronësi të shtetases S. Ll., bashkëshortja e shtetasit A. Ll. Automjeti ishte i parkuar në oborrin e banesës. Nga të shtënat janë shkaktuar vetëm dëme materiale në automjet, ndërsa autorët janë larguar nga vendngjarja. Menjëherë pas njoftimit, shërbimet e Policisë kanë mbërritur në zonë dhe, në bashkëpunim me Drejtorinë Vendore të Policisë Dibër, kanë ngritur pika kontrolli. Gjatë kontrolleve të territorit, rreth dy kilometra larg vendit ku u qëllua “Audi”, në aksin rrugor Rrëshen-Burrel, policia ka gjetur një automjet tip “Golf V” të djegur. Në brendësi të tij janë gjetur dy armë zjarri kallashnikov, të cilat ishin djegur pjesërisht. Armët janë sekuestruar në cilësinë e provës dhe pritet t’i nënshtrohen ekzaminimeve. Nga verifikimet ka rezultuar se ‘Golf V’ ishte kallëzuar I vjedhur prej pronarit të tij që prej 31 korrikut 2025. Policia po vijon kontrollet në zonat ku dyshohet se mund të kenë lëvizur autorët, ndërsa për zbardhjen e ngjarjes po bashkëpunohet edhe me drejtoritë vendore të Policisë në Tiranë, Lezhë dhe Kukës.