Kurorëzimi i Alba Ahmetajt dhe Edlira Marajt nga pastor nga Britania e Madhe, ka ngritur pretendime në komunitetin LGBT për mospëputhje mes kushtetutës dhe kodit të familjes. Në një njoftim më mediat, çifti homoseksual bën me dije se ka dorëzuar kërkesën për shpallje martese në Zyrën e Gjendjes Civile duke marrë për referencë nenin 53 të Kushtetutës së Shqipërisë që përcakton, se “Kushdo ka të drejtë të martohet dhe të ketë familje.” Ndërkohë, Kodi i Familjes e rezervon këtë të drejtë vetëm për çiftet heteroseksuale, duke diskriminuar, sipas tyre, në bazë të orientimit seksual dhe në kundërshtim me garancitë kushtetuese çdo çift tjetër. “Ne jemi të vendosura të ndjekim rrugën ligjore dhe të respektojmë procedurat dhe institucionet e vendit tonë, duke sfiduar përmbajtjen diskriminuese të Kodit të Familjes, për të kërkuar njohjen e të drejtës sonë për martesë, në mënyrë të barabartë me çdo çift tjetër në Shqipëri.” – thotë Alba dhe Edlira në komunikimin për mediat.