Kancelari i ri i Gjermanisë, Friedrich Merz, ka paralajmëruar SHBA-të të “qëndrojnë jashtë” politikës së vendit të tij pasi AfD-ja e ekstremit të djathtë mori mbështetje të fortë nga aleatët e presidentit amerikan, Donald Trump. Merz, 69 vjeç, një konservator i cili u zgjodh kancelar i ekonomisë më të madhe të Evropës vetëm një ditë më parë, tha gjithashtu se planifikonte të fliste në telefon me Trump të enjten. Aleanca e tij CDU/CSU fitoi zgjedhjet e shkurtit duke dalë para partisë anti-imigracion Alternativa për Gjermaninë (AfD), e cila u rendit e dyta me më shumë se 20%. Gjatë fushatës, AfD fitoi mbështetje të fortë nga aleati i Trump, Elon Musk, miliarderi i teknologjisë dhe zv/presidenti i SHBA-së, JD Vance. Merz dënoi "vëzhgimet absurde" të fundit nga SHBA-të, pa specifikuar deklarata të veçanta, dhe tha se "do të donte të inkurajonte qeverinë amerikane ... që të qëndronte kryesisht jashtë" politikës së brendshme gjermane.