Policia lokale në Hamburg tha se ka liruar vajzën e vogël që dyshohej se ishte marrë peng nga i ati, në aeroportin e Hamburgut. Për 18 orë, aeroporti i qytetit ka qëndruar i mbyllur me asnjë avion që nuk ulej dhe as ngrihej prej tij. Burri raportohet se kishte carë me makinë rrethimin e sigurisë dhe kishte hyrë në një nga pistat e aeroportit, mbrëmjen e të shtunës, bashkë me të bijën katër vjecare. Më pas, ai kishte ndaluar makinën nën një aeroplan duke qëndruar bashkë me të bijën atje. Mediat raportuan madje se ai kishte qëlluar me armë zjarri dhe kishte hedhur nga makina shishe me benzinë. Një zëdhënës i policisë dha më herët pak detaje, mes të cilave mosha e personit, 35 vjec dhe tha se policia po komunikonte me të në gjuhën turke, me ndihmën e një përkthyesi, cka të bën të mendosh për origjinën turke të tij.