Kancelarja Angela Merkel kërcënoi të vendosë autoritetin federal për vënien në fre të pandemisë së koronavirusit teksa krerët e landeve në vend po mundohen t`i bëjnë ballë hovit pandemik. Kthesa e papritur e ngjarjeve nxjerr edhe më shumë në pah përpjekjet e Merkelit për të ruajtur kontrollin mbi strategjinë e pandemisë përballë rezistencës së disa prej liderëve të landeve të fuqishme të vendit, që në disa raste kanë zgjedhur të mos i implementojnë masat e marra nga administrata e saj. Incidenca e infektimeve brenda shtatë ditësh në Gjermani vazhdon të rritet me shpejtësi. Sipas Institutit Robert Koch (RKI), vlera e fundit e infeksioneve të reja me virusin Corona për 100.000 banorë brenda një jave ka shkuar në mbi 130. Një vlerë kaq e lartë e infektimeve në Gjermani ka qenë për herë të fundit me 19 janar (131.5). Autoritetet shëndetësore raportuan të dielën për 17.176 infeksione të reja dhe 90 raste të vdekjes nga sëmundjet që kanë lidhje me koronavirusin. Pavarësisht kësaj, disa lande vendosen të ndjekin një rrugë tjetër. Landi i Berlinit ka vendosur që përkundër rritjes së shifrave të infektimeve të dalë nga ciklet e hapjeve dhe mbylljeve të shpeshta. Ndaj ka vendosur që lehtësimet e vendosura më parë të mbeten, si për shembull në tregti dhe kulturë, por njëkohësisht kërkon shtrëngimin e masave sa i përket testimeve. Në këtë mënyrë, ky land ka vendosur që të mos respektojë të ashtuquajturin “frenim emergjent”, të cilin ka parashikuar qeveria federale në rastet kur numri i infektimeve kalon 100 në 100.000 banorë brenda një jave.