Një interes të jashtëzakonshëm ka ndezur libri me kujtime i ish kancelares gjermane, angela merkel, dicka e rrallë kjo për një libër politik në gjermani. Libri i titulluar Liria, ka pushtuar jo vetëm tregun gjerman të librave por edhe ato të 30 vendeve të tjera, përfshirë edhe Kinën. Libri me kujtimet e ish-kancelares Merkel ka rreth 730 faqe dhe përfshin vitet 1954-2021, nga fëmijëria dhe rinia në ish-Republikën Demokratike Gjermane, ribashkimi gjerman, deri te karriera e saj politike në Republikën Federale të Gjermanisë deri në përfundimin e mandatit të saj 16-vjeçar si kancelare në vjeshtën e vitit 2021. 70-vjeçarja Merkel do të bëjë edhe një turne në qytetet e mëdha evropiane për të prezantuar librin e saj. Më 2 dhjetor Merkel do të prezantojë në Uashington librin e saj në prani të ish-presidentit amerikan Barack Obama. Nga disa fragmente të publikuara tashmë nga libri në disa media gjermane si dhe nga disa intervista që ka dhënë ish-kancelarja Merkel, mësohet se në kujtimet e saj ajo trajton edhe çështje aktuale dhe të debatueshme politike.