Dy të shpallur në kërkim, tre persona të proceduar penalisht nga policia e Tiranës dhe tre automjete luksoze të sekuestruara është rezultati vijimit të operacionit Stolen Line. Policia thotë se si rezultat i punës hetimore u sekuestruan 3 automjete luksoze me vlerë totale prej 450 mijë eurosh. Makinat, që të gjitha tip Mercedes Benz dyshohet se janë vjedhur në Gjermani dhe më pas janë transferuar në Shqipëri me qëllim shitjen e tyre. Në lidhje me këtë rast u identifikuan dhe u shpallën në kërkim dy shtetas, 22 dhe 24 vjeç. Gjithashtu, u proceduan penalisht në gjendje të lirë edhe tre shtetas të tjerë, të cilët u konstatuan duke drejtuar automjetet në momentin e sekuestrimit të tyre. Policia njofton se vijon punën për kapjen e dy personave të shpallur në kërkim, si dhe identifikimin e personave të tjerë që mund të jenë përfshirë në aktivitetin e paligjshëm.