Detaje të reja kanë dalë në pah nga vrasja e 36-vjeçarit me origjinë shqiptare në Itali. Ai u qëllua për vdekje gjatë natës së të dielës , ndërsa ndodhej në një kantier ndërtimi ku dyshohet se gjendej së bashku me një grup personash. Sipas hetimeve paraprake, grupi përbëhej nga të paktën pesë persona dhe kishte mbërritur rreth orës 02:30, me dyshimin se do të kryente një vjedhje. Në kantier ishin grumbulluar materiale ndërtimi me vlerë disa mijëra euro. Pronari 35-vjeçar i kompanisë së transportit, i cili ndodhej i vetëm në kantier, ka deklaruar se dëgjoi zhurma gjatë natës dhe mori armën. Ai ka qëlluar disa herë në drejtim të personave që ndodheshin jashtë pronës. Pjesëtarët e tjerë të grupit dyshohet se u larguan, ndërsa 36-vjeçari u godit nga të shtënat. Pavarësisht ndërhyrjes së ekipeve të urgjencës, ai nuk mundi të mbijetojë.