Giorgia Meloni thotë se Italia ka mbështetjen e pjesës më të madhe të vendeve anëtare të Bashkimit Europian në betejën e saj në Gjykatën Europiane të Drejtësisë për të zbatuar marrëveshjen e arritur me Shqipërinë për transferimin e emigrantëve. Kryeministrja italiane foli në senat, ku tha se është habitur kur ka mësuar se vende anëtare të fuqishme të unionit kanë ndërhyrë në mbështetje të Italisë në GJED. Fjalimi i parapriu udhëtimit të Kryeministres italiane drejt Brukselit për takimin pranveror të Këshillit Europian. Meloni tha se në tryezë diskutimi është edhe një rregullore e re për emigrantët e paligjshëm, që për model bazë ka marrëveshjen e nënshkruar mes Italisë dhe Shqipërisë. Kryeministrja italiane tha se shpreson që Gjykata të shmangë kompromentimit të politikave të riatdhesimit, jo vetëm të Italisë, por të të gjitha shteteve anëtare dhe të vetë Bashkimit Evropian, sepse do të nënkuptojë minimin e sistemit Shengen dhe vetë stabilitetin e Evropës.