Kryeministrja italiane, Giorgia Meloni, ka dënuar protestuesit anti-olimpikë duke i quajtur ata "armiq të Italisë" pas dhunës në një demonstratë në Milano të shtunën në mbrëmje dhe sulmeve sabotuese në rrjetin kombëtar hekurudhor. Incidentet ndodhën në ditën e parë të Lojërave Dimërore që Milano, kryeqyteti financiar i Italisë, po i pret së bashku me qytetin alpin të Cortina d'Ampezzo. Meloni vlerësoi mijëra italianë që, sipas saj, po punojnë që Lojërat të zhvillohen pa probleme dhe të paraqesin një fytyrë pozitive të Italisë. "Pastaj ka nga ata që janë armiq të Italisë dhe italianëve, që demonstrojnë 'kundër Lojërave Olimpike' dhe sigurohen që këto imazhe të transmetohen në ekranet televizive në të gjithë botën. Pasi të tjerët prenë kabllot hekurudhore për të parandaluar nisjen e trenave", shkroi ajo në Instagram të dielën. Një grup prej rreth 100 protestuesish hodhën fishekzjarre, bomba tymuese dhe shishe drejt policisë pasi u shkëputën nga grupi kryesor i një demonstrate në Milano. Rreth 10,000 njerëz kishin dalë në rrugët e qytetit në një protestë për kostot e strehimit dhe shqetësimet mjedisore të lidhura me Lojërat. Policia përdori topa uji për të rikthyer rendin dhe arrestoi gjashtë persona. Gjithashtu të shtunën, autoritetet thanë se sabotatorët kishin dëmtuar infrastrukturën hekurudhore pranë qytetit verior italian të Bolonjës, duke ndërprerë udhëtimet me tren. Policia raportoi tre incidente të ndara në vende të ndryshme, të cilat shkaktuan vonesa deri në 2 orë e gjysmë për shërbimet e trenave të shpejtësisë së lartë, ndërqytetas dhe rajonale. Askush nuk ka marrë përgjegjësinë për dëmin.