60 kursantë të Akademisë së Sigurisë në Sauk janë helmuar dhe dyshohet që shkak të jetë ushqimi. 31 kursantë kanë shfaqur rreth orës 22 të së mërkurës simptoma sit ë vjella, diarre, temperaturë të lartë dhe dhimbje koke. Ata janë paraqitur në spitalin infektiv të QSUT, ku pasi kanë marrë ndihmën mjekësore janë rikthyer në mjediset e Akademisë së Sigurisë. Ndërkohë, 29 kursantë të tjerë morën ndihmën mjekësore paraditen e së enjtes. Menuja e tyre e darkës ka përfshirë pilaf, makarona, fasule, sallam, kos, qumësht dhe bukë. Policia dhe Agjencia e Mbikëqyrjes Policore kanë nisur hetimet, teksa Autoriteti Kombëtar i Ushqimit ka marrë mostrat e produkteve që janë konsumuar për t’i analizuar. Kjo është hera e dytë e helmimit të studentëve të Akademisë së Sigurisë. Në rastin e parë, 52 prej tyre morën mjekim në spital, teksa hetimet zbuluan prani të bakterit Esheria Coli dhe stafilokok në makaronat e konsumuara.