Mbi 15 persona janë vrarë dhe 24 janë plagosur rëndë, si pasojë e sulmit me armë zjarri në Fakultetin e Arteve të Universitetit të Karlit, në Pragë të Republikës Çeke, thanë shërbimet e emergjencës. Policia sqaroi se sulmuesi, 24-vjeçar, ka qenë student i universitetit. Trupi i pajetë i tij u gjet në ambientet e universitetit. Policia tha se ai ishte nga një fshat 21 kilometra larg Pragës. Sipas Policisë, babai i të dyshuarit është gjetur i vdekur më herët gjatë ditës. Shefi i policisë Martin Vondrashek, tha në një konferencë për shtyp se numri i viktimave mund të mos jetë përfundimtar. Ai tha se sulmuesi është frymëzuar nga sulme të ngjashme që kanë ndodhur në vende të tjera. Duke folur në konferencën për shtyp, ministri i Brendshëm Vit Rakushan, tha se “nuk ka sinjale që krimi ka pasur lidhje me terrorizëm ndërkombëtar”. Disa studentë shkruan në platformën X, se kishin mbyllur dyert me mjete të ndryshme për të parandaluar sulmuesin. Një email që i ishte dërguar stafit të universitetit, i parë agjencia e lajmeve Reuters, paralajmëronte personelin për të shtënat. “Qëndroni në vendin ku jeni, mos shkoni askund nëse jeni nëpër zyra, mbyllni dyert me orendi të ndryshme dhe fikni dritat”. Policia u kërkoi edhe banorëve të Pragës të qëndronin nëpër shtëpitë e tyre.