Presidenti amerikan Donald Trump, tha se SHBA do të dërgojë më shumë armë në Ukrainë, për ta ndihmuar atë në mbrojtjen kundër sulmeve ruse. “Do të dërgojmë më shumë armë. Na duhet ta bëjmë këtë”, u tha Trump gazetarëve në Shtëpinë e Bardhë. “Ata duhet të jenë në gjendje të mbrohen. Tani po goditen shumë rëndë”, tha ai, duke shtuar se SHBA do të dërgojë kryesisht armë mbrojtëse. Komentet duket se përmbysin njoftimin e Pentagonit, javën e kaluar, ku u tha se SHBA do të ndalojë përkohësisht dërgimin e disa raketave për mbrojtje ajrore dhe armëve të tjera në Ukrainë, për shkak të shqetësimeve se rezervat amerikane janë pakësuar. Ukraina i ka kërkuar vazhdimisht SHBA-së që t’i dërgojë më shumë raketa dhe sisteme Patriot, të cilat i konsideron thelbësore për mbrojtjen e qyteteve të saj nga sulmet pothuajse të përnatshme ruse. Presidenti ukrainas, Volodymyr Zelensky, iu referua sërish nevojës për më shumë armatim, gjatë një fjalimi një ditë më parë. “Ne po punojmë sidomos me palën amerikane për vendimet përkatëse, në lidhje me sistemet Patriot dhe raketat për to”, tha ai. Pas një bisede telefonike me Trumpin më 4 korrik, Zelensky tha se kishte rënë dakord me të që të punojnë për forcimin e aftësisë së Kievit “për të mbrojtur qiellin”, në kohën kur sulmet ruse janë intensifikuar. Ai tha se ka diskutuar me Trumpin për prodhim të përbashkët të armëve, blerje dhe investime. Pas telefonatës, Trump tha se Ukraina do të kishte nevojë për raketa Patriot, por të hënën nuk i përmendi ato.