Një 18-vjeçar ka rënë në prangat e policisë, pasi është kapur në flagrancë me armë zjarri pushkë dhe municion luftarak, të cilat dyshohet se do t’i shiste në qytetin e Sarandës. Gjatë kontrollit fizik ndaj 18-vjeçarit, i cili në momentin që është ndaluar udhëtonte me një motomjet, shërbimet e Policisë i gjetën një armë zjarri pushkë, krehër dhe municion luftarak. Bëhet me dije se janë sekuestruar arma e zjarrit pushkë, municioni luftarak dhe motomjeti që drejtonte 18-vjeçari. Sakaq është arrestuar dhe një 20-vjeçar, si dhe proceduar në gjendje të lirë për shkak të moshës një 17-vjeçar, pasi dyshohet se kishin dijeni për këtë veprimtarinë kriminale të autorit. Operacioni u zhvillua nga Komisariati i Policisë Sarandë në zbatim të masave të përcaktuara në planin operacional mbarëkombëtar "Sundimi i ligjit", për parandalimin dhe goditjen e veprimtarisë kriminale në fushën e armëmbajtjes pa leje. Materialet i kaluan Prokurorisë pranë Gjykatës Sarandë, për veprime dhe hetime të mëtejshme.