Edi Rama e vendosi përballë dy zgjedhjesh, Elisa Spiropalin, ose të ndalë kritikat publike ndaj partisë dhe qeverisë, ose të përballet me përjashtimin. Ish ministrja me sa duket e ka bërë zgjedhjen e saj. Në kushtet kur në mbledhjen me dyer të mbyllura të të majtëve nuk ju dha e drejta e fjalës, Elisa Spiropali iu përgjigj paralajmërimit të Ramës për ta përjashtuar nga grupi parlamentar, përmes një shkrimi të gjatë kritik në rrjetet sociale, i treti i tillë. Spiropali: “Më përjashto! Debatet e brendshme, sado të forta, nuk duhet të shndrrohen në spektakël ndëshkimor publik. Nëse kjo ndodh, problemi nuk është më mospajtimi, është frika nga mospajtimi. Ky fakt kokëfort, ky konstatim i dukshëm, më tepër se vetë paralajmërimi, më detyron të flas. Kur paralajmërimi publik bëhet instrument kërcënimi, heshtja nuk është më maturi, është dorëzim. Nëse qëndrimi im për mënyrën si po funksionon partia, qeveria, shteti, konsiderohet arsye për përjashtim, atëherë po e them qetë dhe qartë: Më përjashto. Jo si sfidë personale. Jo si dramë politike. Jo si shoë mediatik. Por si provë se problemi nuk është te fjala që ngre shqetësim, por te sistemi që shqetësimin nuk e duron. Nuk kam sulmuar Partisë Socialiste. Kam kritikuar modelin që në disa aspekte po dëmton edhe Partinë Socialiste.”