Është zbardhur dëshmia e Kristjan Sterjos, autorit të dyshuar për vrasjen e 20-vjeçarit Johan Zuko në Korçë. Sterjo, i cili u kap rreth gjashtë orë pas ngjarjes, ka dhënë versionin e tij përpara grupit hetimor lidhur me motivin dhe dinamikën e konfliktit që përfundoi në mënyrë tragjike. Sipas dëshmisë së tij, përplasja mes dy të rinjve nuk ishte e momentit, por lidhej me disa episode të mëparshme. Një prej shkaqeve që dyshohet se ka ndikuar në përshkallëzimin e situatës ka qenë ngacmimi i të dashurës së autorit të dyshuar. Megjithatë, hetuesit po marrin në konsideratë edhe konfliktet e mëparshme mes dy të rinjve. Dyshohet se ata kishin pasur debate dhe përplasje të vazhdueshme për shkak të pretendimeve se kush konsiderohej “më i forti” i lagjes. Sipas të dhënave paraprake të hetimit, Sterjo dhe Zuko ishin konfliktuar verbalisht edhe disa ditë përpara vrasjes. Të dy palët dyshohet se kishin pasur ngacmime dhe përplasje ndaj njëri-tjetrit, duke e përshkallëzuar gradualisht marrëdhënien konfliktuale Situata do të merrte një tjetër përmasë ditën e ngjarjes. Sipas dëshmisë së autorit të dyshuar, ai ka marrë armën dhe është vënë në ndjekje të 20-vjeçarit. Më pas, e ka qëlluar me një plumb pas shpine, duke i shkaktuar plagë që rezultuan fatale. Pas ngjarjes, Sterjo është larguar nga vendi i krimit dhe ka qëndruar i fshehur në një zonë pranë varrezave të qytetit. Rreth gjashtë orë më vonë, ai është larguar nga ajo zonë dhe është afruar drejt banesës së tij. Pikërisht në këtë moment është pikasur nga forcat e Policisë, të cilat kanë ndërhyrë menjëherë për arrestimin e tij. Hetimet vijojnë për të zbardhur të plotë dinamikën e ngjarjes. Krahas dëshmisë së autorit të dyshuar, grupi hetimor po analizon edhe provat e mbledhura në vendngjarje, me qëllim përcaktimin e saktë të rrethanave dhe motivit që çoi në vrasjen e 20-vjeçarit Johan Zuko.