Rreth 10,000 doza të vaksinës kundër Covid 19 të prodhuar nga kompania AstraZeneca dhe Universiteti i Oxfordit, pritet të arrijnë në Kosovë në ditët e ardhshme konfirmoi për REL Isme Humolli, zyrtare e emergjencave të OBSH-së në Kosovë. Sipas saj, ky do të jetë kontingjenti i parë i dërgesave të vaksinave kundër koronavirusit përmes programit COVAX. "Ne po shpresojmë që kontigjenti i parë do të jetë 9,600 doza. Ideja është vetëm të fillojnë të vijnë, sepse kur të nisë ardhja, ato mbërrijnë në periudha të caktuara kohore dhe nuk do të mbetemi pa doza", tha Humolli. Kosova vazhdon të jetë ende i vetmi vend në rajon, i cili nuk ka arritur të sigurojë asnjë lloj vaksine kundër Sars Cov 2. Vaksinën e AstraZenecas dhe Oxfordit, Kosova pritet ta marrë falas nëpërmjet COVAX-it që ka për qëllim të shpërndajë vaksina në vende të varfra. Humolli sqaron se për momention, askush nuk mund të japë ndonjë datë të saktë se kur do të arrijnë vaksinat pasi, siç shpjegon ajo, gjithçka varet nga prodhuesi, i cili nuk është duke mundur të prodhojë sasinë e kërkuar.