Papa Leoni udhëton për në Liban, ku pritet të bëjë thirrje për paqe në një vend që është një shënjestër e vazhdueshme e sulmeve ajrore izraelite, në pjesën e dytë dhe të fundit të udhëtimit të tij të parë jashtë Vatikanit si udhëheqës i Kishës Katolike. Papa i parë amerikan do të mbërrijë në Liban nga Turqia, ku ka qendruar për katër ditë dhe paralajmëroi se e ardhmja e njerëzimit ishte në rrezik për shkak të numrit të pazakontë të konflikteve të përgjakshme në botë dhe dënoi dhunën në emër të fesë. Leoni do të takohet me presidentin dhe kryeministrin e libanit dhe do të mbajë një fjalim para udhëheqësve të vendit. Libani, i cili ka pjesën më të madhe të të krishterëve në Lindjen e Mesme, është tronditur nga përhapja e konfliktit të Gazës, ndërsa Izraeli dhe grupi militant shiit libanez Hezbollah hynë në një luftë që kulmoi me një ofensivë shkatërruese izraelite. Udhëheqësit në Liban, vend i cili strehon 1 milion refugjatë sirianë dhe palestinezë dhe gjithashtu po përpiqet të rimëkëmbet nga vitet e krizës ekonomike, janë të shqetësuar se Izraeli do të përshkallëzojë në mënyrë dramatike sulmet e tij në muajt e ardhshëm.