Detaje të reja janë zbardhur nga negociatat që çuan në lirimin e 24-vjeçares Rozalinda Plaka, e cila u mor peng nga ish-i fejuari i saj, Refit Nertil Buzi, pas ngjarjes tragjike në Vidhishtë të Roskovecit. Shefi i Stacionit Policor të Roskovecit, Mariglen Koroveshaj, ka rrëfyer momentet dramatike të operacionit, duke treguar se autori kërkoi që ai të afrohej pranë automjetit ku mbahej peng e reja, i vetëm dhe pa armë. ‘Autori kërkoi që unë të afrohesha personalisht. Më pas më kërkoi të isha i paarmatosur dhe i vetëm. E zbatova kërkesën e tij, pasi prioriteti ynë ishte të shpëtonim jetën e vajzës dhe të shmangnim çdo veprim që mund ta acaronte më tej… Koroveshaj tregoi se u afrua deri në rreth dy metra nga automjeti, ndërsa i gjithë operacioni monitorohej nga forcat speciale RENEA. “Në momentin që u afrova, ai më tha të mos bëja asnjë hap tjetër, sepse do të vriste veten. U tërhoqa dhe vazhduam negociatat derisa u bë e mundur lirimi i pengut. Çdo sekondë ishte vendimtare”. Pas lirimit Rozalinda Plaka ndodhej në gjendje të rënduar psikologjike dhe me dëmtime fizike të shkaktuara gjatë rrëmbimit me forcë nga ish-i fejuari. Koroveshaj tha se e reja nuk ishte në gjendje të ecte. Më pas, polici u rikthye sërish pranë autorit për të vijuar negociatat, me synimin që ai të dorëzonte armën dhe ngjarja të mbyllej. Maringlen Koroveshaj e cilësoi operacion si momentin më të vështirë të karrierës së tij 12-vjeçare në Policinë e Shtetit, ku cdo vendim I marrë ishte jetik përkundrejt 24-vjecares.