Elon Musk, sipërmarrësi i teknologjisë dhe njeriu më i pasur në botë, ka arritur një pasuri prej mbi 400 miliardë dollarësh, raportoi të mërkurën agjencia e lajmeve Bloomberg. Ky është një rekord i paparë në historinë e ekonomisë globale. Rritja e pasurisë së tij vjen si rezultat i fitores së Donald Trump-it në SHBA. Aksionet e prodhuesit të makinave elektrike Tesla, që drejtohet nga Musk, janë rritur me mbi 65% që nga fitorja e Donald Trump në zgjedhje. Sipas Bloomberg, në rritjen pasurisë gjigante ka luajtur rol edhe blerja e aksioneve nga kompania hapësinore SpaceX, gjithashtu e drejtuar nga Musk. Bloomberg raportoi se pasuria e tij ka arritur tani në 440 miliardë dollarë. Elon Musk ka kontribuar në fushatën e presidentit të zgjedhur amerikan, Donald Trump, me 270 milionë dollarë, duke u bërë donatori më i madh në historinë politike të Shteteve të Bashkuara. Në shenjë mirënjohjeje, Trump e ka ngarkuar Musk, sikurse edhe një sërë mbështetës të tjerë të fushatës së tij, me drejtimin e një departamenti të ri për qeverisjen efikase.