Një shpërthim që shkatërroi një shinë hekurudhore në rrugën Varshavë-Lublin të dielën u shkaktua nga një akt sabotazhi, tha të hënën kryeministri polak Donald Tusk. "Dyshimi më i keq është konfirmuar! Shpërthimi i një pajisjeje shkatërroi shinat hekurudhore," shkroi Tusk në platformën e mediave sociale X. "Shërbimet e emergjencës dhe zyra e prokurorit po punojnë në vendngjarje. Në të njëjtën rrugë, më afër Lublinit, janë identifikuar edhe dëme," tha ai. Policia lokale tha të dielën se një makinist treni kishte raportuar dëme në linjën hekurudhore në Poloninë qendrore. Varshava ka thënë në të kaluarën se roli i saj si një qendër ndihmash për Ukrainën në luftën me Rusinë e bën atë një objektiv për akte sabotimi. Moska ka mohuar vazhdimisht çdo veprim të tillë. Polonia është një aleate e NATO-s dhe pozicioni i saj, pranë ukrainës, e ka vendosur atë në vijën e parë të frontit në përballjen mes Rusisë dhe Perëndimit. Tusk nuk tha menjëherë se kush dyshon Polonia se qëndron pas sabotimit, por ajo e ka akuzuar Rusinë në incidentet e mëparshme.