Një burrë u pa i shtrirë anash rrugës në qytetin ukrainas të Bucha-s, të dielën, me duart e lidhura pas shpine dhe një plagë plumbi në kokë...e ai është një nga qindra banorët lokalë që zyrtarët thonë se janë gjetur të vdekur pas pesë javësh pushtimi rus. Zyrtarët lokalë thanë se 50 banorë të vrarë u gjetën pasi forcat ruse u tërhoqën nga qyteti javën e shkuar, dhe ata ishin viktimat e ekzekutimeve të kryera nga trupat ruse. Ata kanë akuzuar Moskën për krime lufte. Ministria ruse e mbrojtjes tha ndërkohë në një deklaratë se të gjitha fotot dhe videot e publikuara nga autoritetet ukrainase, që flisnin për krime nga trupat ruse në Bucha, ishin një provokim dhe se asnjë banor i qytezës nuk i ishte nënshtruar dhunës nga duart e trupave ruse. Agjencia e lajmeve reuters thotë se nuk ka mundur të verifikojë në mënyrë të pavarur se kush ishte përgjegjës për vrasjen e banorëve. Por tre trupa u panë nga reporterët e agjencisë të diëlën, njëri prej të cilëve me duar të lidhura pas shpine, të qëlluar me plumba. Në të tre rastet, nuk kishte shenja lëndimesh të tjera në trup dhe ishin me veshje civile. Në trupin e personit me duar të lidhura pas shpine, kishte shenja diegieje nga baruti në buzë dhe fytyrë, cka tregon se ai është qëlluar nga afër. Dhe ajo që ishte përdorur për ti lidhur duart, dukej se ishte një shami e bardhë. Trupat ruse, ndërsa ishin në qytet, i kërkuan banorëve të mbanin shami të tilla për tu identifikuar. Zyrtarët lokalë thanë se rreth 300 persona u gjetën të vdekur pas tërheqjes së rusisë. Prej tyre, të paktën 50 ishin ekzekutime.